“Ҡыҙыл Башҡортостан” гәзите,  28 декабрь 1938 йыл.

“Ҡыҙыл Башҡортостан” гәзите,  28 декабрь 1938 йыл. https://bash.news/yuldash/37574_kyzyl-bashkortostan-gezite-28-dekabr-1938-jyl

 

                                   Драм   түңәрәге яҡшы эшләй.

  Дәүләкән Башҡорт педучилищеһе эргәһендәге драм түңәрәге  һуңғы көндәрҙә  яҡшы ғына эшләй башланы. Был түңәрәк йыш ҡына  концерттар һәм спектаклдәр бирә.  Түңәрәктең биргән  концерттарын һәм  спектаклдәрен  тамашасылар  ҡыҙыҡһынып ҡарайҙар һәм уларҙың эшенә яҡшы баһа бирәләр.  Түңәрәккә иптәш Бабичева етәкселек итә. Ул түңәрәктең  эшен тағы ла яҡшыртыу өсөн тырышып эшләй.                                                                                                                                                    Ш.Б.

                Түбә   стахановсыларының уңыштары.

  Баймаҡ. Түбә алтын приискаһының  стахановсылары “Башзолото” трестының  күсмә Ҡыҙыл  байрағын үҙ ҡулдарында һаҡлау өсөн көрәшәләр.  Улар…”беҙ көндәлек эшләп сығарыу  заданиеһен  өсләтә арттырып үтәү өсөн, яңынан-яңы эш күрһәткестәре биреү өсөн большевистик  көрәш ойошторабыҙ” тип  йөкләмә алғайнылар.

  Тау цехында забойсы иптәш  Фәхретдинев, 9-сы декабрь көнө бер сменала 1,73 кубометр урнына 9,89 кубометр – 570 процент үтәлеш бирҙе,  210 һум хеҙмәт хаҡы эшләне… Был юғары күрһәткескә ирешеү өсөн ул бер үк сменала ике забойҙа эш  алып барҙы. Был яңы метод булып тора.

   Асыҡ забойҙа эшләгән забойсы Вәхит Яҡшығулов иптәш тә үҙенең эш стилен ҡайтанан ҡорҙо.  Шул   уҡ 9-сы декабрь көнө   иптәш Яҡшығулов бер сменала 3,30 кубометр урнына 16 кубометр эшләп,  смена заданиеһен  484 процентҡа үтәне.  Һәм ул ошо сменала 110 һумлыҡ хеҙмәт хаҡы алды.                                                                                                                                                                      Исламғулов.

       Колхоз йәштәре комсомол сафына  инәләр.

 Әлшәй.  “Дим” колхозында алдынғы йәштәр – ударниктәр  ВЛКСМ сафына инәләр. 1937 йылда  бында бер  комсомолес  та юҡ ине,  быйыл комсомол комитете ойошторолдо,  ул 19 комсомолесте берләштерә. ВЛКСМ члендәренән Ғаффанов Рәхимйән колхозда счетоводлыҡ эшенә, Хәбибуллин Исмағил бригадир  итеп, Әхмәтйәнов  Булат НКВД эшенә һәм 3 комсомолес уҡытыусы, культурник һ.б. итеп үрләтелделәр. 8 комсомолес-агитаторҙар халыҡ иҫәбен алыу тураһында бригадаларҙа аңлатыу эшен алып баралар.

                                                                                                                           Ильясов  Исмәғил.

...

(“Ҡыҙыл Башҡортостан” гәзите,  28 декабрь 1938 йыл.

 Яуаплы редакторы Ш.Ғимаев)

Фк уфа 10 лет